Ҫӗнтерӳ кунӗ… Куҫҫуль витӗр ҫывхартнӑ Ҫӗнтерӳ кунӗ. Ҫак уяв чи ҫутӑ уявсенчен пӗри. Ҫӗнтерӳ пулнӑранпа 78 ҫул иртрӗ пулин те эпир хамӑр аттесене, асаттесене астӑватпӑр-ха. Пирӗн асаттесем мирлӗ пурнӑҫшӑн хӑйсене хӗрхенмесӗр кӗрешнӗ, вӑрҫӑ хирӗнчех куҫӗсене хупнӑ. Вӑрҫӑ паттӑрӗсем ҫинчен, вӑрҫӑ ачисем ҫинчен пирӗн ӳссе пыракан ӑрӑва каласа кӑтартмаллах. 

Кашни ҫулах шкулта Ҫӗнтерӳ кунне халалланӑ уяв иртет. Уяв Мӑн Явӑшри вӑрҫӑ паттӑрӗсене хисеплесе лартнӑ Памятник умӗнче иртрӗ. Уява Мускаври пӗрремӗш кадет корпусӗн инженерӗ Васильев Э. В. килнӗ. Вӑл Ҫӗнтерӳ кунӗ ячӗпе пурне те саламларӗ, мирлӗ пурнӑҫ сунчӗ, парнесем пачӗ. Ҫавӑн пекех уяв ячӗпе вӗренекенсем ташларӗҫ, юрларӗҫ. Уяв вӗҫӗнче вӑрҫӑра пуҫӗсене хунӑ паттӑрсен ячӗпе шӑплӑх саманчӗ пулчӗ, шкулти кадетсем Памятник умне веноксем, чечексем хурса хисеплерӗҫ, пуҫ тайрӗҫ.