Паян, ака уйӑхӗн 25-мӗшӗ, чӑваш чӗлхи кунӗ тата И. Я. Яковлев ҫуралнӑранпа 175 ҫул ҫитрӗ. Ҫавна май шкулта савӑнӑҫлӑ уяв иртрӗ. Эпир ҫак уява чӑвашсене ҫутта кӑларакана, Иван Яковлева халалларӑмӑр. Вӗренекенсем уява хастар хатӗрленнӗ. 1-5 класра вӗренекенсем И. Я. Яковлевӑн калавӗсем тӑрӑх сценкӑсем лартса пачӗҫ: «Пулӑ сӗрни», «Автан», «Чӑлха ҫыхни», «Кулачӑ», «Кахалпа юлхав», «Йӑлӑнтармӑш», «Кашкӑрпа путек», «Лаша шырани». 7 класра вӗренекенсем Аслӑ Патриарха халалласа сӑвӑсем вуларӗҫ, юрӑсем шӑрантарчӗҫ. Савӑнӑҫлӑ уявра И. Яковлевӑн пурнӑҫ ҫулӗпе те паллашма пултарчӗҫ вӗренекенсем, унӑн асаилӗвӗсемпе те паллашрӗҫ. Ҫавӑн пекех «Чӑваш халӑхне» халала та тимлӗ итлесе тӑнларӗҫ. Уяв вӗҫӗнче вӗренекенсем пӗтӗмлетӳсем турӗҫ: «Чӑн та, тӑлӑх ӳснӗ пулин те И. Яковлев чӑваш халӑхӗшӗн питӗ пысӑк, пӗлтерӗшлӗ ӗҫсем тума пултарнӑ».
Иван Яковлев ялан асра!
