Шӑнкӑрав… Шӑнкӑрав… Юлашки шӑнкӑрав. Шкул вӗренсе пӗтерекенсемшӗн пӗр вӑхӑтрах савӑнӑҫлӑ та, ҫав вӑхӑтрах тунсӑхлӑ самант килсе ҫитрӗ. Вӗсемшӗн паян юлашки шӑнкӑрав янӑрарӗ. Уроксем, шавлӑ тӑхтавсем, телейлӗ ачалӑх хыҫала тӑрса юлать, умра вара – аслӑ пурнӑҫ ҫулӗ.
Совет Союзен Геройӗ Ф. И. Ашмаров ячӗллӗ Мӑн Явӑш шкулӗнчен кӑҫал иккӗн вӗренсе тухаҫҫӗ. Уява хӑнасем те килнӗ: Вӑрнар районӗнчи ҫула ҫитмен тата правасене хӳтӗлекен сектор заведующийӗ Краткова М. В.
Яланхи йӗркепе савӑнӑҫлӑ уява шкул директорӗ Надежда Петровна Федорова уҫрӗ. Шкултан вӗренсе тухакансене вӑл экзаменсене лайӑх тытса шкула 10 -мèш класа килме ӑнӑҫу сунчӗ. Ҫавӑн пекех вӑл вӗренекенсене олимпиадӑсенче, тӗрлӗрен конкурссенче, наукӑпа практика конференцийӗсенче ҫитӗнӳсем тунӑшӑн дипломсемпе грамотӑсем пачӗ.
9-мӗш класс вӗренсе пӗтерекенсене пурте ырӑ та ӑшӑ сӑмахсем каларӗҫ. Уйрӑмах пӗрремӗш учителӗн, Алексеева Н. Н. тата класс ертӳҫин, Макарова Елена Ивановнӑн сӑмахӗсене вӗренекенсем хумханса итлерӗҫ, куҫӗсем те шывланчӗҫ вӗсен.
1-мӗш класра вӗренекенсем те тӑххӑрмӗшсем валли салам сӑмахӗсем хатӗрленӗ. Вӗсем ҫепӗҫ те чуна тыткӑнлакан сӑвӑсем каларӗҫ, телей сунчӗҫ.
Шкултан вӗренсе тухакансем те учительсене, ашшӗ-амӑшӗсене тав сӑмахӗсем каларӗҫ, илемлӗ юрӑсем шӑрантарчӗҫ. Юлашки шӑнкӑрав пама тивӗҫлисем 9-мӗш класс пӗтерекен Петров Никита тата Краснова Арина пулчӗҫ.
Уяв вӗҫӗнче 9-мӗш класс пӗтерекенсем флеш-моб ташларӗҫ тата шкул вальсӗ ташласа ҫаврӑнчӗҫ. Тӑххӑрмӗшсене ырӑ сунса 7-мӗш класра вӗренекенсем уявра пулӑшса пычӗҫ.
ЫРӐ ТА ТЕЛЕЙЛӖ ҪУЛ ПУЛТӐР СИРЕ, ТӐХХӐРМӖШСЕМ!