Каҫхи тӳпене сǎнама пурте юрататпǎр. Епле илемлĕн йǎлтǎртатаҫҫĕ каҫхи тӳпери ҫутǎ ҫǎлтǎрсем, вǎй вылянǎнах туйǎнать-ҫке! Ҫут ҫанталǎка сǎнама юратнипех-и тен, Мǎн Явǎш шкулĕнче вĕренекенсем космос ҫулне такǎрлатасшǎн. Вĕсене ҫǎлтǎрсем чĕнеҫҫĕ тейĕн. Акǎ Мǎн Явǎш шкулĕнче ҫамрǎк космонавтсен виҫҫĕмĕш класĕ ҫитĕнет. Вĕсене пултарулǎх ҫулĕпе Павлова А. В. ертсе пырать. Мĕн чухлĕ ҫитĕнӳсем туман пулĕ вĕренекенсем?! Космос тĕнчине тǎрǎшсах тĕпчеҫҫĕ вĕренекенсем. Кǎҫал та вĕсем чылай ҫитĕнӳсем турĕҫ. 8-мĕш класра вĕренекенсем сывлǎшра вĕҫекен ҫĕленсем ǎсталаҫҫĕ. Ҫавна май 8-мĕш класра вĕренекен Ильина Маргарита Вǎрнар районĕнче иртнĕ «Сывлǎш ҫĕленĕсем» конкурсра иккĕмĕш вырǎн йышǎнма пултарнǎ. 7-мĕш класра вĕренекен Миронова Аня вара космос карапĕсем ҫинчен видео ӳкерсе 1-мĕш вырǎна тивĕҫрĕ. Аршуткин Семен «Космосǎн тĕлĕнтермĕш тĕнчи» конкурсра 1-мĕш вырǎн, Шариков Максим 3-мĕш вырǎнсене йышǎнчĕҫ.
Кашни ҫулах республикǎра «Николаев вулавĕсем» конкурс иртет. Унта та Мǎн Явǎшра вĕренекенсем хастаррǎн хутшǎнаҫҫĕ, малти вырǎнсене йышǎнаҫҫĕ. Кǎҫал ҫак конкурса пирĕн шкултан иккĕн хутшǎнма пултарчĕҫ. Конкурсǎн Вǎрнар районĕнчи тапхǎрĕнче 9-мĕш класра вĕренекен Шариков Максим «А. Николаев Вǎрнар районне килсе курни» ĕҫĕпе 3-мĕш вырǎна тухрĕ. Ҫак конкурсрах 5-мĕш класра вĕренекен Петрова Александра космос ҫинчен ҫырнǎ хǎйĕн сǎввисемпе 1-мĕш вырǎн йышǎнма пултарчĕ.